Þjónusta á sviði vélaverkfræði er eitt af aðalsmerkjum Mannvits. Sérfræðingar okkar leysa fjölbreytt verkefni í vélahönnun, stýringum, þróun tæknilausna, hagkvæmniathugun og verkefnastjórnun fyrir íslenskan iðnað. Fyrirtækið býr einnig að mjög sérhæfðri tækniþekkingu til að veita áliðnaðinum þjónustu, innanlands sem utan, en þau verk eru unnin af dótturfélagi okkar, HRV. Sérfræðingar okkar sinna öllum helstu verkþáttum við undirbúning, byggingu og rekstur mannvirkja sem tengjast orkufrekum iðnaði á Íslandi. Þar má nefna mat á umhverfisáhrifum, umhverfisrannsóknir og umhverfisvöktun, áætlanagerð, undirbúningsrannsóknir og hönnun mannvirkja og búnaðar.

Víða er unnið að undirbúningi verkefna í orkufrekum iðnaði á Íslandi og það gefur til kynna að fjárfesting sé framundan. Á árinu 2013 var þó ekki mikið um slík verkefni og því snéri starfsemi iðnaðarsviðs að miklu leyti að verkefnaþróun. Segja má að árið hafi einkennst af undirbúningi stærri verkefna. Í því sambandi má nefna olíu- og gasverkefni í norðurhöfum sem eru ennþá á byrjunarreit en undirbúningur á Íslandi er grundvöllur að því að virðisaukandi þjónusta verði hér á landi.

Mannvit hefur unnið meira að smærri verkefnum á þessu ári en venjan er.  Meðal annars var unnið að hönnun og uppbyggingu fiskimjölsverksmiðja, efnaverksmiðju, ásamt gasvinnslu og jarðgerð úr lífrænum úrgangi og sorpi. Fjárfesting í sjávarútvegi fór lítillega af stað en betur má ef duga skal og við teljum að þar geti Mannvit komið mikið að uppbyggingu og endurnýjun.

Innreið Mannvits á ný markaðssvæði eins og Noreg og Grænland hélt áfram. Lítil verkefni hófust á Grænlandi en á þeim markaði er að finna spennandi tækifæri í framtíðinni.

Mannvit veitir alhliða og fjölbreytta þjónustu á sviði mannvirkja. Okkar viðskiptavinahópur er mjög breiður og því þurfum við að hlusta vel á viðskiptavininn til að komast að því hvaða þjónusta er hagstæðust fyrir hann. Sumir vilja að við sjáum um alla verkþætti á meðan aðrir viðskiptavinir hafa mjög sterkar skoðanir á því hvernig verkefnið skuli unnið. Það er því nauðsynlegt að nálgast verkefnin á mismunandi vegu eftir viðskiptavinum.

Það er mikil samkeppni um þau verkefni sem eru í gangi á okkar mörkuðum, þ.e. á Íslandi og í Noregi. Við höfum lagt ríka áherslu á að þróa okkar eigin verkefni og árið 2013 var engin undantekning í þeim efnum. Verkefni í Noregi koma hinsvegar mest í gegnum tilboðsgerð.

Af helstu verkefnum árið 2013 á sviði mannvirkja má nefna hönnun hótels og íbúða við Hörpu, breytingar á Flugstöð Leifs Eiríkssonar, hönnun gagnavera, skóla í Noregi, en þar í landi er einnig töluvert um jarðtækniverkefni. Árið 2013 einkenndist einnig af fjölbreyttum verkefnum á sviði samgangna og skipulags en þar má nefna endurhönnun á Hverfisgötu, skoðun á nýju flugvallarstæði fyrir Reykjavíkurflugvöll og nýrri umferðarmiðstöð og endurskoðun á svæðisskipulagi höfuðborgarsvæðisins.

Björgunarpakki fyrir stærra húsnæði, brunatæknileg ráðgjöf, úttekt á innivist vinnustaða og áhættumat eru helstu verkefni á sviði umhverfis- og öryggismála.

Á rannsóknarstofu okkar hafa verið unnin fjölbreytt verkefni bæði hér á landi og í Noregi.  Helstu verkefnin árið 2013 voru plötu-, malbiks og steypuprófanir fyrir hina ýmsu viðskiptavini ásamt fylliefnisprófunum.  Einnig hefur starfsfólk okkar rannsakað gæði húsnæðis víða um land, sérstaklega m.t.t. myglusvepps og rakavandamála.